Vazirlar Mahkamasi huzuridagi Davlat test markazi tomonidan joriy yilda amalga oshirilayotgan ishlar, amaldagi qaror va farmonlarning mazmun-mohiyati bilan tanishtirish, yoshlar va ota-onalarning murojaatlarini joylarda o‘rganish maqsadida sayyor qabullar o‘tkazilmoqda.

Ana shunday tadbirlardan biri 2021-yil 9-fevral kuni Qashqadaryo viloyatida bo‘lib o‘tdi.

Davlat test markazi direktori o‘rinbosari Radjabov Sardor Baxtiyorovich rahbarligida Davlat test markazining Qashqadaryo viloyati bo‘limi xodimlari bilan Koson shahridagi 8-sonli musiqa va san’at maktabida tashkil etilgan mazkur tadbirda umumta’lim maktablari rahbarlari, o‘qituvchilar, o‘quvchilar hamda ularning ota-onalari ishtirok etdi.

Sayyor qabulda Davlat test markazi mas’ullari tomonidan asosiy e’tibor O‘zbekiston Respublikasi Prezidenti va Vazirlar Mahkamasining ta’lim muassasalariga qabul test sinovlarining adolatliligi va shaffofligini ta’minlash, test topshiruvchilar uchun yanada keng shart-sharoit va imkoniyatlar yaratish bo‘yicha qabul qilingan farmon va qarorlarining mazmun mohiyatini tushuntirishga qaratildi.

Shu bilan birga, joriy yil oliy ta’lim muassasalarining bakalavriat ta’lim yo‘nalishlariga qabul test sinovlarini soddalashtirish, test sinovlarini o‘tkazish bo‘yicha o‘zgarish va yangiliklar, tegishli vazirlik va idoralar hamkorligida bu borada amalga oshirilayotgan ishlar mohiyati va shu kabi masalalarga qiziqish yuqori bo‘ldi.

Davlat test markazi matbuot xizmati