Normativ-huqıqıy hújjetler joybarları dodalawı portalına Ministrler Kabinetiniń “Ulıwma orta, orta arnawlı bilimlendiriw mekemeleri hám kásip-óner mektepleri pitkeriwshileriniń bahaların joqarı bilimlendiriw mekemelerine kiriw imtixanlarında inabatqa alıw tártibi haqqında”ǵı qarar joybarı qoyılǵannan soń, ayırım internet baspalarında joybar haqqında bazı nadurıs pikirler bildirilmekte hám Mámleketlik test orayın joybar avtorı sıpatında ayıplaw jaǵdayları da ushıraspaqta. Usı múnásibet penen qarar joybarı haqqında toqtalıp ótiw lazım tabıldı.

Dáslep AQSh, Angliya, Germaniya, Yaponiya, Avstraliya, Rossiya, Belorussiya, Túrkiya sıyaqlı onnan artıq sırt el tájiriybeleri úyrenilip, bul qarardıń joybarı tayarlanǵanlıǵın, onı tayarlawda Mámleketlik test orayı menen birge, Xalıq bilimlendiriw ministrligi, Joqarı hám orta arnawlı bilimlendiriw ministrligi, Bilimlendiriw sapasın qadaǵalaw mámleketlik inspekciyası sıyaqlı tikkeley bilimlendiriw sistemasın rawajlandırıwǵa juwapker mámleketlik mekemeler qatnasqanlıǵın esletiw orınlı. Sonday-aq, joybardıń hárbir bánti olar menen kelisilgen. Joybar joqarı bilimlendiriw mekemelerine oqıwǵa kiriwde abiturientlerge keń imkaniyat, sharayat jaratıwı menen birge, orta arnawlı bilimlendiriw mekemelerin hám kásip-óner mekteplerinde bilim sapasın arttırıwǵa xızmet etedi.

Qarar joybarı abiturientler ushın heshqanday jeńillik belgilemeydi. Ol oqıwshınıń bilimin bahalawda bir kórsetkish sıpatında alınbaqta. Sonday-aq, joybardı tayarlawda korrupciyanıń aldın alıw itibarǵa alınǵan. Mámleketimiz tárepinen barlıq tarawlarda korrupciyaǵa qarsı qatań hám keskin gúres alıp barılıp atırǵanlıǵı, bul jolda barlıq kúsh, imkaniyatlar jumsalıp atırǵanlıǵı nátiyjesinde xalqımızdıń huqıqıy sanası, huqıqıy mádeniyatı joqarılamaqta.

Hárbir puqara qarar joybarı boyınsha usınıs hám pikirlerin bildiriwine boladı. Olar inabatqa alınadı hám birde-bir pikir itibarsız qaldırılmaydı.

Mámleketlik test orayı