Joriy yilning 21-dekabr kuni @olgauzbekiston nomli internet kanalida “Qonun o‘yinchoq bo‘lsa, bo‘lajak yurist go‘r bo‘larmidi?” nomli maqola chop etildi. Maqola mazmunini huquqshunoslik ta’lim yo‘nalishiga kirish test sinovlari fanlari majmuasiga e’tiroz tashkil etadi. O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasining 19-dekabrdagi majlisi 11-son bayoni bilan test sinovi topshiriladigan fanlar majmuasi ro‘yxati tasdiqlandi. Shu o‘rinda tasdiqlangunga qadar amalga oshirilgan ishlarga to‘xtalib o‘tsak.

Prezidentimizning PQ-4319-son qaroriga muvofiq 2020/2021-o‘quv yili qabulidan boshlab test sinovi topshiriladigan fanlar majmuasi tarkibida barcha test topshiruvchilar uchun ona tili (o‘zbek, rus yoki qoraqalpoq tili), matematika va O‘zbekiston tarixi fanlaridan iborat majburiy fanlar bo‘limi kiritilganligini inobatga olib, test topshiriqlari tarkibi, test topshiriqlarini ishlash uchun ajratiladigan vaqt, baholash mezoni ko‘rib chiqildi. Oliy va o‘rta maxsus ta’lim vazirligi hamda Xalq ta’limi vazirligi mutaxassislari ishtirokida 2019-yilning sentabr oyida fanlar majmuasi loyihasi muhokama qilindi.

Loyiha 2019-yil 26-sentabr kuni keng jamoatchilik muhokamasi uchun e’lon qilindi va bildirilgan 15 000 dan ortiq taklif, mulohaza hamda savollar o‘rganib chiqildi.

Joriy yilning oktabr oyida respublikaning barcha hududlarida umumta’lim maktablari va akademik litseylar bitiruvchilari o‘rtasida,
1–10-noyabr kunlari onlayn tarzda majburiy fanlar bo‘limi bo‘yicha test topshiriqlari aprobatsiyasi o‘tkazildi. Aprobatsiya jarayonida 2500 nafarga yaqin o‘quvchi ishtirok etdi.

Shularga muvofiq, loyiha bo‘yicha tasarrufida oliy ta’lim muassasalari mavjud bo‘lgan vazirlik va idoralarning, shu jumladan Toshkent davlat yuridik universitetining taklif va e’tirozlarini inobatga olgan holda qayta ko‘rib chiqildi. Hamda hududlarda tashkil etilgan sayyor qabullarda o‘quvchilar va ota-onalarga test sinovlaridagi o‘zgarishlar, jumladan, test sinovi topshiriladigan birinchi va ikkinchi bo‘lim fanlari, test topshiriqlarini bajarish uchun ajratilayotgan vaqt me’yori haqida batafsil ma’lumotlar berilgan.

Mazkur maqola ma’lumotlariga ishonadigan bo‘lsak, huquqshunoslik kasbini tanlaganlar aynan tarix fanidan test sinovi topshirish evaziga savodsiz bo‘lib qolmoqdalar.

Saralashda foydalanilgan umumta’lim fanlari abituriyentning tanlangan ta’lim yo‘nalishi kelajagini belgilab beradimi, degan savol ham ko‘ndalang turibdi. Ayting-chi, huquqshunoslikni tanlagan abituriyent o‘qishga kirgandan keyin ushbu fanlarni to‘rt yil davomida o‘qiydimi? Oliy ta’lim muassasalari bakalavriat ta’lim yo‘nalishida 4 (magistratura bilan 6) yil davomida kasbini qay darajada o‘zlashtirganligi kirish test sinovidagi fanlar majmuasiga bog‘liqmi?  Yo‘q albatta.

Maqolani yozishdan oldin muallif shu sohaga oid me’yoriy-huquqiy hujjatlar bilan tanishishi kerak edi? Agar muallif hujjatlar bilan tanishganida edi, fanlar majmuasi ro‘yxatini shakllantirish faqat test markazining ishi emasligini, u bir nechta vazirlik, idoralar bilan birgalikda tayyorlanishini, shuningdek, avvalgi yilda ona tilining birinchi blokda qo‘yilishi ham jamoatchilik orasida e’tiroz (boshqalar kabi 3 ta ta’lim yo‘nalishini tanlay olmaslik)ga sabab bo‘lganligini, mazkur ro‘yxat ana shu noroziliklarni hisobga olib qayta ishlanganligini bilgan bo‘lardi.

Davlat test markazi matbuot xizmati