Mámleketlik test orayı hákimshiligi tárepinen 2021-jıldıń 1-yarımı ushın belgilengen kóshpeli qabıllawlar ‘ótkeriw jobasına muwapıq Qaraqalpaqstan Respublikası hám wálayatlarda Oray iskerligine tiyisli máseleler boyınsha fizikalıq hám yuridikalıq shaxslardıń múrájatların kórip shıǵıw maqsetinde kóshpeli qabıllawlar shólkemlestiriw dawam etpekte.
Náwbettegi kóshpeli qabıllawlar Mámleketlik test orayı direktorı Karimov Madjit Malikovich tárepinen Qaraqalpaqstan Respublikası hám Xorezm wálayatında ótkerildi.
Dáslepki kóshpeli qabıllawlar Xorezm wálayatında 20, 21-aprel kúnleri Úrgenish qalasında jaylasqan Prezident xalıq qabıllawxanası, Boǵot rayonındaǵı 3-ulıwma bilimlendiriw mektebi hám Xanqa rayonındaǵı 17-ulıwma bilimlendiriw mektebinde shólkemlestirildi.
Keyingi kóshpeli qabıllawlar Qaraqalpaqstan Respublikasında 21, 22-aprel kúnleri Ámiwdárya rayonındaǵı 33-ulıwma bilimlendiriw mektebi, Taxtakópir rayonındaǵı 10-ulıwma bilimlendiriw mektebi hám Nókis qalasında jaylasqan Prezident xalıq qabıllawxanasında ótkerildi.
Jaslar, pitkeriwshi oqıwshılar, oqıtıwshılar, ata-analar hám juwaplı shaxslar qatnasqan bul qabıllawlar Prezidentimizdiń tarawǵa tiyisli qararları, pármanları, “Jaslardı qollap-quwatlaw hám xalıq salamatlıǵın bekkemlew jılı”nda qabıllanǵan Mámleketlik baǵdarlamasınan kelip shıqqan halda kiriw test sınaqlarına tiyisli eń sońǵı jańalıqlar, kútilip atırǵan ózgerisler, test sınaǵı barısın ápiwayılastırıw, test tapsırıwshılar ushın jáne de keńirek imkaniyat, qolaylılıqlarǵa tiykarlanǵan shárt-sharayatlar jaratıw, logikalıq pikirlewge baǵdarlanǵan test tapsırmalarınan keńirek paydalanıw, ulıwma bilimlendiriw pánlerinen milliy test sistemasın engiziw, sonday-aq, Mámleketlik test orayı iskerligin tártipke salıwshı normativ-huqıqıy hújjetler, qararlar joybarların sholıwı, mánis-mazmunına arnaldı.
Ilaj dawamında úlken qızıǵıwshılıq penen qatnasqan oqıwshılar, oqıtıwshılar, ata-analar, juwaplı shaxslar hám basqalardıń sorawlarına tolıq juwap berildi.
Sonday-aq, kóshpeli qabıllawlar dawamında 24, 27-mart kúnleri bolıp ótken shet tilin biliw hám iyelew dárejesin anıqlaw test sınaqlarında C1 tildi biliw dárejesi boyınsha eń joqarı nátiyje kórsetip, Mámleketlik test orayı tárepinen jaslardıń shet tilin úyreniwge bolǵan qızıǵıwshılıǵın arttırıw hám eń bilililerin múnásip sıylıqlaw maqsetinde ótkerilgen tańlaw jeńimpazlarınan birine aylanǵan J.N.Nurmetov planshet hám basqa estelik sawǵalar menen sıylıqlandı.
Mámleketlik test orayı xabar xızmeti
