“Davlat test markazi rahbariyati va mansabdor xodimlari tomonidan 2019 yilning I yarim yili davomida jismoniy va yuridik shaxslarni joylarda qabul qilish bo‘yicha sayyor qabullarni o‘tkazish jadvali” asosida joylarda sayyor qabullar o‘tkazilmoqda.

Navbatdagi sayyor qabullar 2019-yil 28-may kuni Qoraqalpog‘iston Respublikasi, Nukus shahridagi 2-son Nukus tibbiyot kollejida, 29 may kuni Xorazm viloyati Urganch axborot va kompyuter texnologiyalari kollejida tashkil etildi. Ularda Davlat test markazi direktorining o‘rinbosari Xakberdiev Kaxramon Kurbanovich, hududiy bo‘limlar rahbarlari va xodimlari ishtirok etdilar. Sayyor qabullar davomida Markaz faoliyati, O‘zbekiston Respublikasi Prezidentining 2019-yil 14-maydagi “Oliy ta'lim muassasalariga test sinovlari orqali qabul qilish tizimini takomillashtirish bo‘yicha qo‘shimcha chora-tadbirlar to‘g‘risida” PQ-4319-son hamda O‘zbekiston Respublikasi Vazirlar Mahkamasining 2019-yil 13-maydagi “Oliy ta'lim muassasalariga o‘qishga qabul qilishda milliy hamda xalqaro baholash tizimlari sertifikatlarini tatbiq qilish chora-tadbirlari to‘g‘risida” 395-son qarorlari bo‘yicha keng tushuntirishlar berildi.

Shuningdek, joriy yil qabulida kirish test sinovlaridagi yangiliklar, berilayotgan imkoniyat va imtiyozlar, hamda hujjat topshirishda yaratilayotgan qulayliklar va o‘zgarishlarga alohida e'tibor qaratildi, berilgan murojaatlar shaxsan ko‘rib chiqilib, tegishli me'yoriy-huquqiy hujjatlar asosida batafsil javob berildi. Murojaatchilarning bildirgan takliflari, fikr-mulohazalari e'tiborga olindi.

Qoraqalpog‘iston Respublikasi va Xorazm viloyatida o‘tkazilgan sayyor qabullarda abituriyentlar, o‘qituvchilar, ota-onalar, nodavlat ta'lim muassasalari rahbarlari, ta'lim muassasalarining psixologlari, ommaviy axborot vakillaridan iborat 229 nafar fuqaro ishtirok etdi.

Axborot xizmati