“Davlat test markazi rahbariyati tomonidan 2021-yilning 1-yarmi davomida jismoniy va yuridik shaxslarni joylarda qabul qilish bo‘yicha sayyor qabullarni o‘tkazish jadvali” asosida joylarda sayyor qabullar tashkil etilmoqda.

2021-yil 13-14-yanvar kunlari Davlat test markazi direktori M.Karimov tomonidan Buxoro va Navoiy viloyatlarida Davlat test markazining mazkur viloyatlar bo‘limlari xodimlari ishtirokida sayyor qabul o‘tkazildi. Qabullar 13-yanvar kuni Buxoro viloyati bo‘yicha Olot tumani 12-son umumiy o‘rta ta’lim maktabi va Qorako‘l tumani madaniyat markazida, 14-yanvar kuni Navoiy viloyati bo‘yicha Karmana tumani musiqa maktabi va Navbahor tumani 9-son umumiy o‘rta ta’lim maktabida bo‘lib o‘tdi.

Shuningdek, direktor o‘rinbosari S.Radjabov va Davlat test markazining vodiydagi viloyatlar bo‘limlari xodimlari ishtirokida 12-14-yanvar kunlari Namangan, Farg‘ona va Andijon viloyatlarida, jumladan, 12-yanvar kuni Namangan shahar 86-sonli umumiy o‘rta ta’lim maktabida, 13-yanvar kuni Farg‘ona davlat universiteti qoshidagi 3-sonli akademik litseyda, 14-yanvar kuni Andijon viloyati Bo‘ston tumanidagi 14-sonli umumiy o‘rta ta’lim maktabida sayyor qabullar tashkil etildi.

Mazkur tadbirlar davomida O‘zbekiston Respublikasi Prezidentining farmon va qarorlari hamda Vazirlar Mahkamasining qarorlari asosida 2020-yilda ta’lim muassasalariga qabul test sinovlarida abituriyentlarni qo‘llab-quvvatlash va yanada keng imkoniyatlar ochish maqsadida test sinovlari jarayonlarining soddalashtirilganligi va qulay shart-sharoitlar yaratilganligi to‘g‘risida ma’lumotlar berildi.

Shuningdek, joriy yil qabulida o‘tkaziladigan kirish test sinovlarida rejalashtirilayotgan yangiliklar va o‘zgarishlarga alohida e’tibor qaratildi.

Qabullar jarayonida fuqarolar tomonidan fikr-mulohazalar va takliflar bildirildi.

Fuqarolarning murojaatlari shaxsan ko‘rib chiqilib, murojaatchilarning savollariga tegishli me’yoriy-huquqiy hujjatlar asosida batafsil javob berildi.

Davlat test markazi matbuot xizmati