“Mámleketlik test orayı hákimshiligi tárepinen 2021-jıldıń 1-yarmı dawamında fizikalıq hám yuridikalıq shaxslardı orınlarda qabıllaw boyınsha kóshpeli qabıllawlardı ótkeriw kestesi” tiykarında orınlarda kóshpeli qabıllawlar shólkemlestirilmekte.

2021-jıl 13, 14-yanvar kúnleri Mámleketlik test orayı direktorı M.Karimov tárepinen Buxara hám Nawayı wálayatlarında belgilengen orınlarda kóshpeli qabıllawlar ótkerildi. Sonday-aq, direktor orınbasarı S.Radjabov hám Mámleketlik test orayınıń Namangan, Ferǵana, Andijan wálayatlarındaǵı aymaqlıq bólim xızmetkerleri qatnasında 12 – 14-yanvar kúnleri belgilengen orınlarda kóshpeli qabıllawlar bolıp ótti.  

Bul ilajlar dawamında Ózbekstan Respublikası Prezidentiniń párman hám qararları, Ministrler Kabinetiniń qararları tiykarında 2020-jılda bilimlendiriw mekemelerine qabıllaw test sınawlarında abiturientlerdi qollap-quwatlaw hám olarǵa keń imkaniyatlar ashıw maqsetinde test sınawları procesi ápiwayılastırılǵanlıǵı hám qolaylı shárt-sharayatlar jaratılǵanlıǵı haqqında maǵlıwmatlar berildi.

Sonday-aq ámeldegi jıl qabıllawı ushın ótkeriletuǵın kiriw test sınawlarında jobalastırılıp atırǵan jańalıqlar hám ózgerislerge ayırıqsha itibar qaratıldı.

Kóshpeli qabıllaw barısında puqaralar tárepinen kóplep pikir-usınıslar bildirildi.

Puqaralardıń múrájatları kórip shıǵılıp, olardıń sorawlarına tiyisli normativ-huqıqıy hújjetler tiykarında tolıq juwaplar berildi.

Mámleketlik test orayı xabar xızmeti