Hurmatli abituriyentlar! Sizlar uchun Davlat test markazi tomonidan muhim qulayliklar yaratildi.

O‘zbekiston Respublikasi Vazirlar Mahkamasining 2018 yil 3 apreldagi 261-son qarori bilan tasdiqlangan «O‘zbekiston Respublikasi oliy ta'lim muassasalarining bakalavriatiga o‘qishga qabul qilish uchun kirish test sinovlarini o‘tkazish tartibi to‘g‘risidagi Nizom» asosida kiritilgan o‘zgarishlarni hisobga olib, 2018 yil may oyidan boshlab Repetitsion test materiallari yangi shaklda chop etiladi. Yangi shaklga muvofiq test topshiriqlari kitobida har bir fandan 30 tadan savol va javoblar varaqasida savollar raqamlariga mos raqamdagi doirachalar bo`ladi.

Bu bilan Siz 1-15 avgust kunlari test sinovlarida ishlatiladigan savollar kitobi va javoblar varaqasining yangi shakli bilan tanishish, ular bilan ishlash ko‘nikmasini mustahkamlash imkoniyatiga ega bo‘lasiz.

DIQQAT! Shuningdek, may oyidan boshlab yangi tuzilgan savollardan namunalar berib borish yo‘lga qo‘yiladi. Unga ko‘ra joriy yilda test sinovlarida ishlatiladigan savollardan namunalar chop etib boriladi. Namunaviy savollar fanlar kesimida e'lon qilinadi.  Ular bilan Siz Davlat test markazining  “Axborotnoma” ilmiy-uslubiy jurnali maxsus sonlarida tanishishingiz mumkin. Hozirda jurnalning bir nechta maxsus sonlarini nashrga tayyorlash ishlari yakunlanmoqda. Jurnallarni Davlat test markazi va uning viloyatlardagi bo‘linmalaridan olishingiz mumkin.

Hurmatli abituriyentlar! Yangi shakldagi repetitsion test materiallari va “Axborotnoma” jurnalining maxsus sonlarida bosilgan namunaviy savollardan birgalikda foydalaning va bilimingizni sinab boring.

Qo‘shimcha ma'lumotlar uchun saytimizni kuzatib boring.