Test sinovlarida ishtirok etish uchun rasman joriy yil 15 iyundan ro‘yxatdan o‘tish boshlandi. O‘tgan bir hafta davomida respublikamizda 70 ta birinchi sifatida tanlangan oliy ta'lim muassasalari va filiallariga o‘qishga kirish uchun jami 3660 nafar abituriyent ro‘yxatdan o‘tgan.

Hozirgi 21 iyunga qadar ba'zi oliy ta'lim muasassalarini birinchi sifatida 1 nafardan, ayrimlarini 382 nafardan abituriyent tanlagan. Masalan, Andijon mashinasozlik instituti, Milliy rassomlik va dizayn instituti, Navoiy konchilik instituti Nukus filiali, Toshkent davlat stomatologiya instituti, Toshkent tibbiyot akademiyasi Termiz filiali va Toshkent viloyati Chirchiq davlat pedagogika instituti uchun 1 nafardan abituriyent ro‘yxatga olingan bo‘lsa, bu ko‘rsatkich Guliston davlat universitetida 382, Samarqand davlat universitetida 353, Farg‘ona davlat universitetida 267 nafarni tashkil etmoqda. Qolgan oliy ta'lim muassasalari bo‘yicha ko‘rsatkichlarni havola etilayotgan ma'lumotlar orqali tanishish mumkin.

Ro‘yxatdan o‘tish ko‘rsatkichlari kundan-kunga oshib bormoqda. Davlat test markazi barcha abituriyentlarga omad va muvaffaqiyat tilaydi.

Davlat test markazi