Test sinovlarida ishtirok etish uchun ro‘yxatdan o‘tish muddatining tugashiga 13 kun qoldi. Bu muddat qanchalik yaqinlashgan sari ro‘yxatdan o‘tganlar soni ko‘paymoqda. 

Kechagi 84755 miqdor bugun 114777 ni tashkil etmoqda. Jumladan, kunduzgi ta'limga 105348, kechkiga 446, sirtqiga esa 8983 nafar abituriyent ro‘yxatdan o‘tganligini ma'lum qilamiz.

3 iyul holati tahliliga qaraganda kunduzgi ta'lim shaklida tahsil olish uchun Samarqand davlat universitetini 5985, Andijon davlat universitetini 5649, Urganch davlat universitetini 5353 nafar abituriyent tanlab, ro‘yxatdan o‘tgan bo‘lsa, aksincha, Navoiy konchilik instituti Nukus filialini 15, Milliy raqs va xoreografiya oliy maktabini 37 va Samarqand veterinariya meditsinasi instituti Nukus filialini 47 nafar abituriyent tanlagan, xolos. Filiallar orasida hozircha yetakchi Termiz davlat universitetining Denov filialidir. Ushbu oliy ta'lim muassasasini 845 nafar abituriyent tanlab, ro‘yxatdan o‘tgan.

Kechki ta'lim bo‘yicha O‘zbekiston davlat jahon tillari universitetini 88 nafar abituriyent tanlagan, bu hozircha eng ko‘pi bo‘lib turibdi. Sirtqi ta'limda – Samarqand davlat universiteti (654 nafar), Toshkent viloyati Chirchiq davlat pedagogika instituti (560) va Guliston davlat universiteti (525) esa ko‘proq tanlangan.

Bular ro‘yxatdan o‘tishning 17 kunlik ma'lumotlari bo‘lib, ro‘yxatdan o‘tish uchun murojaatlar soni kundan-kunga oshib bormoqda.

Respublikadagi oliy ta'lim muassasalari bo‘yicha ko‘rsatkichlar bilan havolani bosish orqali tanishish mumkin.

Davlat test markazi barcha abituriyentlarga omad va muvaffaqiyat tilaydi.

Davlat test markazi