Ba’zi ijtimoiy tarmoqlarda Qashqadaryo viloyati G‘uzor tumanida abituriyentlar davlat xizmatlari markazidan test sinovlariga kirish uchun ruxsatnoma olishayotgani, bunda har bir abituriyent o‘zi haqidagi ma'lumotlarni kiritishi talab etilayotganligi, lekin texnik vosita bitta va abituriyentlarning ko‘pligi navbatlar hosil bo‘lishiga olib kelayotganligi xususida, shuningdek, ruxsatnoma chop etadigan vositalar sonini ko‘paytirish so‘ralgan ma'lumot berildi.

Ushbu masala bo‘yicha shuni ta'kidlash kerakki, 2019-yil 20-iyuldan 26-iyul soat 16:20 ga qadar respbublika bo‘yicha 903 438 nafar abituriyent ruxsatnomasini chop etib olgan. Bu borada haliga qadar navbat yuzaga kelganligi to‘g‘risida e'tiroz bo‘lmadi, davlat xizmatlari markazlari bo‘yicha ham. Qayd etish kerakki, Davlat test markazining serveri ruxsatnoma chop etib olinayotgan kunlik ko‘rsatkichlardan ancha yuqori  quvvatga ega. G‘uzor tumani davlat xizmatlari markazi tomonidan abituriyentlar uchun bu turdagi bepul xizmat ko‘rsatilishi belgilangan. Masala mahalliy tuman doirasida.

Qo‘shimcha sifatida abituriyentlar ruxsatnomalarini uyidan chiqmay ruxsatnoma.dtm.uz veb-sayti orqali chop etib olishi yoki istalgan (uyiga yaqin) oliy o‘quv yurtlari qabul komissiyalari, har bir tumanda davlat xizmatlari markazlari yoxud tuman bandlikka ko‘maklashish markazlari orqali olishi kabi qulayliklar yaratilganligini eslatib o‘tamiz. Qulayliklarga oid ma'lumotlar bilan Davlat test markazi, Oliy va o‘rta maxsus ta'lim vazirligi, davlat xizmatlari markazlari va tuman bandlikka ko‘maklashish markazlari veb-saytlarida batafsil tanishib olish mumkin. Abituriyentlar mazkur qulayliklardan foydalangan holda ruxsatnomalarini chop etib olishlarini so‘rab qolamiz.

Davlat test markazi