Bilimni baholash agentligi tomonidan Agentlik faoliyatiga oid masalalar yuzasidan jismoniy va yuridik shaxslarning murojaatlarini ko‘rib chiqish maqsadida sayyor qabullar tashkil etilmoqda.

Navbatdagi sayyor qabullar joriy 19-oktabr kuni Agentlik direktori maslahatchilari Abduvahob Hayitov tomonidan Samarqand davlat arxtektura-qurilish universiteti akademik litseyida, Zohid Shakarov tomonidan Namangan muhandislik-qurilish instituti akademik litseyida o‘tkazildi.

Sayyor qabullar ochiq muloqot tarzida tashkil etildi. Unda kirish test sinovlariga oid so‘nggi yangiliklar, kiritilishi kutilayotgan o‘zgarishlar, test sinovi o‘tkazish jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, abituriyentlar uchun yaratilgan imtiyoz turlari, chet tillari va umumtaʼlim fanlaridan o‘tkazilayotgan milliy sertifikat uchun test sinovlari, shuningdek, Bilim va malakalarni baholash agetligining o‘tgan yillardagi faoliyati hamda kelgusidagi rejalari haqida batafsil maʼlumotlar berilib, test sinovlari bilan bog‘liq yangi normativ-huquqiy hujjatlar mazmun-mohiyati tushuntirildi.

Shundan so‘ng sayyor qabul davomida o‘qituvchilar va talabalar hamda aholi vakillari tomonidan berilgan savollarga mavjud meʼyoriy-huquqiy hujjatlar asosida, batafsil javob qaytarildi hamda ishtirokchilar tomonidan bildirilgan fikr-mulohazalar, takliflar o‘rganib chiqilishi aytildi.