O‘zbekiston Respublikasi Prezidenti farmonlari, qarorlari va hududlarga tashriflari doirasida berilgan topshiriqlar ijrosini ta’minlash bo‘yicha joylarga chiqib o‘rganishlar o‘tkazish, Davlat test markazining Samarqand viloyatidagi bo‘limi tomonidan amalga oshirilayotgan ishlar holatini o‘rganish, Davlat test markazining istiqboldagi rejalarini amalga oshirish, shuningdek, joylarda jismoniy shaxslar va yuridik shaxslarni shaxsan qabul qilish hamda ularning murojaatlarini ko‘rib chiqish maqsadida Davlat test markazi direktori o‘rinbosarlari Radjabov Sardor Baxtiyorovich va Batirov Sherzod Negmuratovich 2021-yil 8-aprel kuni Samarqand viloyatida bo‘ldilar.

Dastlab, Davlat test markazining Samarqand viloyatidagi bo‘limi tomonidan amalga oshirilayotgan ishlar holati o‘rganilib, faoliyat samaradorligini oshirish, ish sifatini yaxshilash va amalga oshirilayotgan ishlarni jadallashtirish uchun tegishli ko‘rsatma va topshiriqlar berildi.

So‘ngra, Davlat test markazining istiqboldagi rejalarini amalga oshirish uchun tegishli tashkilotlar va mahalliy hokimiyat organlari bilan uchrashuvlar o‘tkazildi.

Shuningdek, markaz faoliyatiga oid masalalar yuzasidan jismoniy va yuridik shaxslarning murojaatlarini ko‘rib chiqish maqsadida sayyor qabul tashkil etildi.

Direktor o‘rinbosarlari S.Radjabov va Sh.Batirov rahbarligida Davlat test markazining Samarqand viloyatidagi bo‘limi tomonidan tashkil etilgan sayyor qabul Samarqand iqtisodiyot va servis instituti akademik litseyida 100 nafardan ortiq fuqaro – yoshlar, bitiruvchi o‘quvchilar, o‘qituvchilar va ota-onalar ishtirokida bo‘lib o‘tdi.

Sayyor qabul ochiq muloqot shaklida o‘tkazilib, oliy ta’lim muassasalariga kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlarini shakllantirish va umumta’lim fanlaridan milliy test tizimini joriy etish, shuningdek, sohaga oid qaror va farmonlarning mazmun-mohiyatiga bag‘ishlandi.

Tadbir davomida katta qiziqish bilan qatnashgan o‘quvchilar, o‘qituvchilar, ota-onalar, mas’ul shaxslar va boshqalarning savollariga batafsil javob berildi.

Shu bilan birga, shu kunning o‘zida O‘zbekiston Respublikasi Prezidentining Samarqand viloyatidagi Xalq qabulxonasiga tashrif buyurilib, Davlat test markazi faoliyati bilan bog‘liq bo‘lgan murojaatlar bilan tanishildi va ularni yechimi bo‘yicha tegishli ko‘rsatma va yo‘nalishlar berildi.

Davlat test markazi matbuot xizmati