Bugungi zamonda testologiya, test topshiriqlarini shakllantirish texnologiyasi yo‘nalishlari jiddiy sur’atlar bilan takomillashmoqda. Davlat test markazi mutaxassislari ham ushbu soha rivojlangan bir necha mamlakatda bo‘lib, psixologik test topshiriqlarini shakllantirish texnologiyasi, shaxsning intellektual qobiliyati (IQ), mantiqiy fikrlashi va psixologik barqarorligini aniqlovchi test topshiriqlarini shakllantirish, natijalarni tahlil qilish hamda amalda qo‘llanilayotgan xalqaro modellar bo‘yicha ilg‘or tajribalarni o‘rgandilar.

Bular va xorijiy hamkorlar bilan birgalikda olib borilgan faoliyati natijasida Davlat test markazida yangi turdagi test sinovlarini joriy etish, shuningdek, o‘rganilgan modellar asosida mantiqiy fikrlash bo‘yicha ishlab chiqilgan test topshiriqlarini xalqaro metodikalar asosida tizimlashtirish ishlari olib borilmoqda.

Bugungi kunda Davlat test markazida J.Raven metodikasi asosida shaxsning intellektual rivojlanish darajasini aniqlovchi “Progressiv matritsa” moslashtirilgan testi ishlab chiqildi va ularni aprobatsiyadan o‘tkazish rejalashtirildi.

Aprobatsiya joriy yilning 17-yanvar kuni Davlat test markazida bo‘lib o‘tadi.

Aprobatsiya jarayonida ishtirok etish istagida bo’lgan talabgorlar http://iq.dtm.uz/ sayti orqali ro‘yxatdan o‘tib, aprobatsiyada ishtirok etishlari mumkin.

Jarayonda ishtirok etuvchilar soni cheklangan bo‘lib, jami 200 ta ariza qabul qilish rejalashtirilgan.

Ro‘yxatdan o‘tganda talabgorlarga aprobatsiyada ishtirok etish vaqti yozilgan ruxsatnoma taqdim etiladi.

Talabgorlar mazkur ruxsatnoma va shaxsini tasdiqlovchi hujjat - pasport bilan belgilangan vaqtdan 30 daqiqa oldin (10:30 gacha) Toshkent shahridagi Davlat test markazi bosh binosi (Toshkent shahri, Yunusobod tumani, Bog‘ishamol ko‘chasi 12)ga kelishlari lozim.

Test sinovi 11:00 dan 11:30 gacha bo‘lib o‘tadi.

Ro‘yxatdan o‘tish va aprobatsiya jarayonida ishtirok etish bepul.

Davlat test markazi matbuot xizmati