Oliy ta’lim muassasalarining bakalavriat ta’lim yo‘nalishlariga o‘qishga kirish test sinovlarini sifatli va adolatli tashkil etish, shaffof va xolis o‘tkazish maqsadida jarayonga guruh nazoratchisi sifatida jalb etilishi rejalashtirilgan nomzodlar uchun 2022-yil 24-martdan boshlab o‘quv-seminar mashg‘ulotlari boshlandi.

Qoraqalpog‘iston Respublikasi, viloyatlar va Toshkent shahrida bo‘lib o‘tayotgan o‘quv seminar mashg‘ulotlari amaldagi “Oliy ta’lim muassasalariga o‘qishga qabul qilish tartibini yanada takomillashtirish to‘g‘risida” 261-son qarori asosida tashkil etilib, ularda oliy ta’lim muassasalari tomonidan tavsiya etilgan professor-o‘qituvchilar, professional ta’lim hamda xalq ta’limi tizimidagi ta’lim muasssasalarida faoliyat olib borayotgan rahbar va pedagog xodimlar ishtirok etmoqda. Mashg‘ulotlar Davlat test markazi mutaxassislari tomonidan ishlab chiqilgan o‘quv dasturi asosida o‘tkazilmoqda.

O‘quv-seminar mashg‘ulotlariga jami 5 830 nafar nomzod jalb etilgan bo‘lib, mashg‘ulotlar 28-martga qadar davom etadi. O‘quv seminar mashg‘ulotlari bir necha bosqichda o‘tadi va yakunlangandan so‘ng imtihon o‘tkazilib, munosiblar tanlab olinadi.

Davlat test markazi matbuot xizmati