2019-yil 14-dekabr kuni O‘zbekiston Respublikasi Vazirlar Mahkamasi huzuridagi Davlat test markazi direktori o‘rinbosari Xakberdiyev Kaxramon Kurbanovich rahbarligida Markaz faoliyatiga oid masalalar yuzasidan jismoniy va yuridik shaxslarning murojaatlarini shaxsan ko‘rib chiqish bo‘yicha Sirdaryo va Jizzax viloyatlarida sayyor qabullar o‘tkazildi.

Sayyor qabullar Sirdaryo viloyatida Xorijiy tillarga ixtisoslashtirilgan umumta’lim maktab internatining faollar zalida 150 nafardan ortiq umumta’lim maktablari bitiruvchilari, pedagog kadrlar, ota-onalar, fuqarolar, ommaviy axborot vositalari vakillari ishtirokida, Jizzax viloyatida esa JizDPI qoshidagi Sayljoy akademik litseyi faollar zalida 100 ga yaqin o‘rta maxsus kasb-hunar ta’limi muassasalari, akademik litseylar va umumta’lim maktablari bitiruvchilari, o‘qituvchilar va ota-onalar ishtirokida bo’lib o’tdi.

Uchrashuvlarda Davlat test markazi direktori o‘rinbosari Xakberdiyev Kaxramon Kurbanovich O‘zbekiston Respublikasi Prezidentining 2019-yil 14-maydagi “Oliy ta’lim muassasalariga test sinovlari orqali qabul qilish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi PQ-4319-son qarori, Vazirlar Mahkamasining 2019-yil 13-maydagi “Oliy ta’lim muassasalariga o‘qishga qabul qilishda milliy hamda xalqaro baholash tizimlari sertifikatlarini tatbiq qilish chora-tadbirlari to‘g‘risida”gi 395-sonli, 2018-yil 3-apreldagi “Oliy ta’lim muassasalariga o‘qishga qabul qilish tartibini yanada takomillashtirish tartibi to‘g‘risida”gi 261-sonli qarorlari hamda test sinovlari bilan bog‘liq boshqa normativ-huquqiy hujjatlarning mazmun-mohiyati bo‘yicha uchrashuv ishtirokchilariga tushunchalar berdi.

Uchrashuvlar ochiq muloqat tarzida o‘tkazilib, unda O‘zbekiston Respublikasi oliy ta’lim muassasalariga kirish test sinovlaridagi so‘nggi o‘zgarishlar, abituriyentlar uchun yaratilayotgan imkoniyatlar, test sinovlarining shaffof va adolatli o‘tishi uchun Davlat test markazi tomonidan amalga oshirilayotgan ishlarga alohida e’tibor qaratildi.

Sayyor qabul ishtirokchilari Davlat test markazi faoliyati, oliy ta’lim muassasalarining bakalaviriatiga o‘qishga kirish imtihonlari va boshqa o‘zlarini qiziqtirgan savollariga javoblar olishdi.

Davlat test markazi matbuot xizmati