2020-yil 9-yanvardan 17-yanvargacha Sirdaryo viloyatidagi umumta’lim maktablari va kasb-hunar kollejlarining rahbarlari va pedagog xodimlari uchun Davlat test markazi Sirdaryo viloyati bo‘limi xodimlari tomonidan oliy ta’lim muassasalariga kirish imtihonlari bilan bog‘liq O‘zbekiston Respublikasi Prezidenti va Vazirlar Mahkamasi qarorlarining mazmun-mohiyati hamda Davlat test markazi tomonidan amalga oshirilayotgan ishlar bo‘yicha joylarga chiqqan holda o‘quv-seminarlar tashkil etildi.

Ularda tuman (shahar) hokimliklarining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosarlari, xalq ta’limi bo‘limlari mudirlari, umumta’lim maktablari va kollejlarning rahbarlari, pedagog xodimlaridan iborat jami 1438 nafar xodim  ishtirok etdi.

Joylarda o‘tkazilgan o‘quv-seminarlarda ishtirokchilarga test sinovlari bilan bog‘liq normativ-huquqiy hujjatlarning mazmun-mohiyati, oliy ta’lim muassasalari bakalavriatiga o‘qishga qabul qilish tizimiga kiritilgan qo‘shimcha va o‘zgartirishlar, abituriyentlar uchun yaratilgan qulayliklar va imkoniyatlar, test sinovlarini ochiq, shaffof va adolatli o‘tkazish uchun amalga oshirilayotgan ishlar, oliy ta’lim muassasalarining bakalavriat ta’lim yo‘nalishlariga mos test sinovi topshiriladigan fanlar majmuasi, test topshiriqlari soni hamda baholash mezonlari haqida tushunchalar berildi.

Shuningdek, Davlat test markazi va “DAVR PRESS” nashriyoti hamkorligida nashr etilayotgan “Test topshiriqlari to’plamlari” va “e-Sinov” tizimi haqida ko‘rgazmali taqdimotlar qilindi.

O‘quv-seminarlarning 2-bosqichi fevral oyida o‘tkazilishi rejalashtirilgan.

Davlat test markazi matbuot xizmati