Ma’lumki, abituriyentlarning test sinovida to‘plagan ballari test sinovi o‘tkazilgan kunning ertasiga e’lon qilinadi.

Lekin, Davlat komissiyasining 2-son bayonida Farg‘ona viloyatining So‘x tumanida o‘tkazilgan test sinovi natijalarini bir kunda e’lon qilmaslikka istisno tariqasida ruxsat berilgan. Chunki:

• So‘x tumani O‘zbekistonning anklav hududi hisoblanadi;
• u yerda o‘tkazilgan test sinovi materiallarini Qirg‘iziston Respublikasi hududidan olib o‘tish lozim;
• test materiallarini har kuni Toshkent shahriga yetkazish imkoni mavjud emas.

Shu sababli So‘x tumanida ishtirok etgan abituriyentlarning test natijalari 1 kunda e’lon qilinmayapti.

Hozirga qadar So‘x tumanida 8-9-avgust kunlari va 10-avgust kuni 1-smenada o‘tkazilgan test sinovi natijalari e’lon qilingan bo‘lib, keyingi kunlarning natijalari test materiallari Davlat test markaziga yetib kelishi bilan e’lon qilinadi.

Qo‘shimcha ma’lumot: bugun (12-avgust) 1-smenada So‘x tumanida test sinovlari to‘liq yakunlandi.

Davlat test markazi axborot xizmati