Belgili bolǵanınday, test sınaqları shólkemlestirilip atırǵan oqıw jılınan aldınǵı jıllarda bilimlendiriw mákemelerin pitkergen abituriyentlar test sınaqlarında qatnasıw ushın ushın bazalıq esaplaw muǵdarınıń yarım esesi (122.500 som) muǵdarında tólemdi ámelge asıradı.
Test sınaqları ushın tólemdi belgilengen múddette ámelge asırmaǵan abiturientler dizimnen ótpegen esaplanadı hám test sınaqlarında qatnasa almaydı.
Sol sebepli Mámleketlik test orayı tárepinen abiturientlerge esletpe sıpatında 22-iyulǵa shekem tólemdi ámelge asırmaǵan abiturientler test sınaqlarında qatnasa almawı haqqında SMS xabarnama jiberildi.
Biraq ayırım telegram kanallar hám sociallıq tarmaqlar tárepinen bul jaǵday basqasha túsindirilip, “Neshe ret tólew kerek?”, “Tólengen bolsa da, nege jáne tólew soralmaqta?” sıyaqlı pikirler bildirilmekte.
Bul jaǵday boyınsha tómendegilerdi málim etemiz:
1. 2021-jıl 20, 21, 22-iyul kúnleri respublikamızda dem alıs kúnleri dep járiyalanǵanlıǵı sebepli bank kassaları islemewi múmkinligin inabatqa alǵan halda Mámleketlik test orayı tárepinen 19-iyul kúni test sınaǵı ushın tólemdi ámelge asırıw boyınsha daǵaza berildi hám 20-iyul kúni esletpe sıpatında abiturientlerge SMS xabar jiberildi. Álbette bul abiturientlerden artıqsha tólem óndiriw maqsetinde emes, bálki olardı xabardar etiw, olarǵa qosımsha esletpe beriw maqsetinde ámelge asırıldı.
2. Mámleketlik test orayınıń abiturientlerdi onlayn dizimge alıw sisteması (my.dtm.uz saytı) Birden-bir billing sistemasına integraciyalanǵan bolıp, aldınǵı jıllar pitkeriwshilerine invoys qáliplestiriledi. Bir invoys nomerine belgilengen muǵdar (122.500 som) dan artıq tólemdi ámelge asırıw imkanı joq. Yaǵnıw abiturient tólemdi tolıq ámelge asırǵan bolsa, bul invoys nomerine basqa tóley almaydı. Bunıń nátiyjesinde abiturientler tárepinen artıqsha tólemniń aldı alınadı.
3. Abiturientler tárepinen tólem ámelge asırılǵanda Birden-bir billing sisteması tárepinen Mámleketlik test orayınıń sistemasına real waqıt rejiminde xabar jiberiledi hám abiturientlerdiń jeke kabinetinde qáliplestirilgen invoys ornında tólem tabıslı ámelge asırılǵanlıǵı haqqında maǵlıwmat payda boladı. Sonday-aq, abiturientlerdiń telefon nomerine bul haqqında SMS xabarnama jiberiledi.
Mámleketlik test orayı xabar xızmeti
