Davlat test markazining 2019-yil MEDIA-REJAsiga muvofiq “Test sinovi topshiriladigan fanlar majmuasida o‘zgarishlar, test topshiriqlari soni va baholash mezoni, abituriyentlarni Davlat test markazining rasmiy veb-sayti orqali online ro‘yxatga olish tizimi, davlat va rus tilini bilish darajasi to‘g‘risida sertifikat berishni joriy etish, shuningdek, Britaniya Kengashi bilan hamkorlikda “APTIS for teachers” testlarini o‘tkazish” mavzularida matbuot anjumani o‘tkazildi.

Anjuman 2019-yil 28-dekabr kuni Axborot va ommaviy kommunikatsiyalar agentligi binosida tashkil etildi. Unda Davlat test markazi direktori o‘rinbosari Xakberdiyev Kaxramon Kurbanovich, boshqarma boshliqlari Zuparxodjayeva Sevar Zakirovna, Radjabov Sardor Baxtiyorovich, Qo‘chqarov Diyorbek Ulug‘bekovich, bo‘lim boshliqlari Noraliyev Ulug‘bek Saydganiyevich, Urayeva Elvira Usmanovna, yuridik byuro boshlig‘i Madrahimova Guljahon Ro‘zimboy qizi, matbuot xizmati rahbari Boboyev Orziqul Mirzayevich hamda fan ekspertlari, ommaviy axborot vositalari jurnalistlari, blogerlar, o‘quv markazi vakili ishtirok etdilar.

Tadbir davomida Davlat test markazi tomonidan yangi o‘quv yilidan boshlab, oliy ta’lim muassasalarining bakalavriatiga qabul test sinovlarida yaratilayotgan qulaylik va imkoniyatlar, majburiy fanlar bo‘yicha shakllantirilgan test topshiriqlari, ular joylarda va onlayn aprobatsiyadan o‘tkazilganligi, abituriyentlarga Davlat test markazi veb-sayti orqali ro‘yxatdan o‘tkazishni joriy etish, CEFR talablariga muvofiq B1 va B2 darajada yangi fanlardan test savollari tayyorlanganligi hamda aprobatsiyalardan o‘tkazilganligi, shuningdek, chet tili o‘qituvchilari uchun ustama bo‘yicha Britaniya Kengashi bilan hamkorlikda “APTIS for teachers” testlarini tashkil qilinayotganligi, bu testlar Davlat test markazi tomonidan har oyda bir marotaba o‘tkazilishi, natijalar Buyuk Britaniya mutaxassislari tomonidan tekshirilishi va 3 kunda e’lon qilinishi to‘g‘risida ma’lumotlar taqdim etildi.

Tele va radiokanallar, bosma va elektron ommaviy axborot vositalari vakillari, blogerlar, o‘quv markazi vakilining savollariga batafsil javob berildi.

Matbuot anjumani qizg‘in musohaba ruhida o‘tdi

Davlat test markazi matbuot xizmati