O‘zbekiston Respublikasi Vazirlar Mahkamasining 2020-yil 11-noyabrdagi 715-son qarori bilan tasdiqlangan “Professional ta’lim muassasalariga o‘qishga qabul qilish tartibi to‘g‘risida nizom”ning 2-ilovasida “Professional ta’lim muassasalariga abituriyentlarni test sinovlari orqali qabul qilish tartibi” belgilab berilgan.

Unga ko‘ra, professional ta’lim muassasalarida abituriyentlar murojaatlarini ko‘rib chiqish uchun apellatsiya komissiyasi tashkil etiladi.

Apellatsiya komissiyasi tarkibiga professional ta’lim muassasasi qabul komissiyasining a’zolari va fanlar bo‘yicha ekspertlar kiritiladi.

Apellatsiya komissiyasining tarkibi professional ta’lim muassasasi direktorining buyrug‘i bilan tasdiqlanadi. Apellatsiya komissiyasi raisi ta’lim muassasasi direktori hisoblanadi.

Test sinovlari natijasidan norozi bo‘lgan abituriyent yoki uning ota-onasi yoxud ularning o‘rnini bosuvchilar (vasiylar) test sinovlari to‘liq yakunlanib, tanlov natijasi e’lon qilingandan so‘ng ikki kun davomida professional ta’lim muassasasida tashkil etilgan apellatsiya komissiyasiga yozma yoki elektron shaklda apellatsiya shikoyatini berish huquqiga ega.

Bunda abituriyentga apellatsiya shikoyati qabul qilinganligi to‘g‘risida xabarnoma beriladi.

Apellatsiya shikoyatini bergan abituriyent xabarnomada belgilangan kunda o‘zining pasporti (tug‘ilganlik haqida guvohnoma) va abituriyent ruxsatnomasi bilan kelishi shart.

Apellatsiya shikoyati ikki ish kunida apellatsiya komissiyasi tomonidan abituriyentning yozma javoblari asosida ko‘rib chiqiladi.

Davlat test markazi matbuot xizmati