Bugun Davlat test markazida 2020-2021-o‘quv yilida oliy ta’lim muassasalariga kirish test sinovlari jarayonlari tahliliga bag‘ishlangan umumiy yig‘ilish bo‘lib o‘tdi.

Yig‘ilishda O‘zbekiston Respublikasi Bosh prokuraturasi mas’ul xodimi Tursunmetov Murodullo Maxmudjanovich, Oliy va o‘rta maxsus ta’lim vazirligi vakili Mamanazarov Abdusamat Abdusaitovich, Xalq ta’limi vazirligi vakili Xayitov Nodirbek Sobirjanovich, Davlat test markazi rahbariyati va xodimlari ishtirok etdilar.

Tadbir davomida so‘zga chiqqan Davlat test markazi direktori M.Karimov va Bosh prokuratura mas’ul vakili M.Tursunmetovlarning 2020-2021-o‘quv yilida o‘tkazilgan oliy ta’lim muassasalariga kirish test sinovlari jarayonlari, yutuq va kamchiliklar to‘g‘risida tahliliy axboroti eshitildi. Shuningdek, salbiy holatlarning oldini olish, buning uchun zamonaviy axborot texnologiyalarini joriy qilish, maxsus platforma va dasturlar yaratish ishlari yuzasidan Davlat test markazida olib borilayotgan ishlar to‘g‘risida direktor o‘rinbosari S.Radjabov, bosh boshqarma boshlig‘i F.Mirzayevlarning hisoboti tinglandi.

Yig‘ilish yakunida Davlat test markazi tomonidan o‘tkazib kelinayotgan test sinovlarini adolatli, shaffof, belgilangan qat’iy tartib asosida o‘tkazilishini to‘liq ta’minlash maqsadida yangi texnologiyalarni joriy etish, zamonaviy, oson va samarali shakl va usullardan foydalanish, manfaatdor vazirlik va idoralar bilan hamkorlikni jadallashtirish, targ‘ibot ishlarini kuchaytirishga kelishib olindi.

Davlat test markazi matbuot xizmati