O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasi majlisining 2-son bayoni tasdiqlandi.

Davlat komissiyasining 2-son bayoniga muvofiq:

• Oliy ta’lim muassasalarining bakalavriat ta’lim yo‘nalishlariga kirish test sinovlari Qoraqalpog‘iston Respublikasi, viloyatlar va Toshkent shahrida joylashgan markaziy stadionlarda, qoida tariqasida, kuniga ikki smenada o‘tkaziladi.
• Bunda, har 30 ta test topshirig‘ini yechish uchun (javoblar varaqasini to‘ldirish bilan birga) 90 daqiqa vaqt ajratiladi (60 ta test topshirig‘iga jami 180 daqiqa).
• Pandemiya sharoitida chet tilini bilish darajasini aniqlash bo‘yicha test sinovlari o‘tkazilmaganligini inobatga olib, 2020-2021-o‘quv yili qabuli uchun oliy ta’lim muassasalarining bakalavriat ta’lim yo‘nalishlariga o‘qishga qabul qilishda IELTS Indicator B2 va undan yuqori darajasiga ega bo‘lgan abituriyentlarga istisno tariqasida chet tili fanidan maksimal ball beriladi.

Davlat test markazi matbuot xizmati