Ayni kunlarda vazirliklar, idoralar, Qoraqalpog‘iston Respublikasi Vazirlar kengashi, Toshkent shahar va viloyatlar hokimliklari bilan hamkorlikda 2019/2020 o‘quv yilida oliy ta'lim muassasalari bakalavriatiga o‘qishga qabul qilish bo‘yicha kirish test sinovlarini o‘tkazish uchun binolarni tanlash va ularni belgilangan talab darajasida tayyorlash ishlari amalga oshirilmoqda.

Bugungi kunda respublika bo‘yicha jami 69 ta bino ajratib olindi, ularning eng kattasi 1710, eng kichigi 240 o‘rinlidir. Ularda bir kunda va 2 ta smenada 1277 ta guruhda jami 38 ming 310 nafar abituriyent test topshirishi mo‘ljallanmoqda. Test sinovlarining adolatli o‘tishini ta'minlash maqsadida bir kunda 2 ming 554 nafar nazoratchi jalb etilishi belgilanmoqda.

Binolarning 60 tasi o‘tgan 2018 yilgi test sinovlarida foydalanilgan katta sig‘imli binolar hisoblanadi.

Binolarning test sinovlariga tayyorlik holati amaldagi nizom talablari asosida o‘rganildi. 

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan joriy yilda test sinovlarini o‘tkazish uchun tavsiya etilgan 69 ta binoning atrofi o‘ralgan, kirish-chiqish joylari abituriyentlar soniga, metallorama, videofiksatsiya qurilmalarini o‘rnatish uchun belgilangan talablarga mos. 

Binolarning elektr tarmog‘ini qo‘shimcha o‘rnatiladigan kondisioner, videokuzatuv kameralari, videofiksatsiya va barmoq bilan tanish qurilmalari iste'mol quvvatiga moslashtirish ishlari amalga oshirilmoqda.

Bir smena uchun zarur o‘tirish o‘rinlarini tayyorlash uchun yana 13 mingdan ortiq bir o‘ringa mo‘ljallangan stol va stulga zaruriyat bor. 

Test jarayonida abituriyentlarga qulay shart-sharoitlar yaratish maqsadida Respublika bo‘yicha rejaga ko‘ra katta hajmli binolarni sovutishga mo‘ljallangan 487 ta konditsionerlar o‘rnatilishi zarur. Hozirga qadar 300 ga yaqin shunday konditsionerlar o‘rnatilgan, qolganlarini o‘rnatish ishlari davom etmoqda. 

Abituriyentlarni yetarli miqdorda ichimlik suvi va ruchkalar bilan ta'minlash, abituriyentlarni to‘planish joylarida soyabonlar tashkil etish, test sinovlari jarayoni bilan bog‘liq banerlarni tayyorlash, ota-onalar uchun kutish joylarida maishiy sharoitlarni yaratish mahalliy hokimiyatlar va davlat organlari tomonidan sifatli hal etilmoqda.

Axborot texnologiyalari va kommunikatsiyalarini rivojlantirish vazirligi bilan hamkorlikda binolar uchun 1155 tadan ortiq videokuzatuv kameralari va 120 dona mobil aloqalarini to‘suvchi qurilma (glushitel) hamda abituriyentlar sonidan kelib chiqqan holda metalloramalar, barmoq izi asosida tanish vositalari tayyorlanmoqda.

Ma'lumotlar va raqamlar prognoz va o‘rganish asosida shakllantirilgan bo‘lib, tayyorgarlikning yakuniga qadar o‘zgarishi mumkin.

Davlat test markazi