2019/2020-o‘quv yilining 1-yarmida Davlat test markazi tomonidan o‘tkazilgan test sinovlari hamda O‘zbekiston Respublikasi Vazirlar Mahkamasining 2018-yil 03 apreldagi 261-son qarori bilan tasdiqlangan “O‘zbekiston Respublikasi oliy ta'lim muassasalarining bakalavriatiga o‘qishga qabul qilish uchun kirish test sinovlarini o‘tkazish tartibi to‘g‘risidagi nizom”ga muvofiq joriy yil o‘quv yilida oliy ta'lim muassasalariga qabul bo‘yicha test sinovlarini o‘tkazish uchun so‘nggi tayyorgarlik ishlariga bag‘ishlangan matbuot anjumani o‘tkazildi.

Anjuman 2019-yilning 28-iyul kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida tashkil etildi. Unda Davlat test markazi direktori Karimov Madjit Malikovich, bosh boshqarma boshlig‘i Rajabov Barna Jo‘raqulovich va Axborot xizmati rahbari Boboyev Orziqul Mirzayevichlar ishtirok etdilar.

Tadbir davomida Davlat test markazi tomonidan yanvar-iyul oylari davomida o‘tkazilgan test sinovlari bo‘yicha umumiy ma'lumotar, oliy ta'lim muassasalarining bakalavriatiga qabul test sinovlarini o‘tkazish bo‘yicha so‘nggi tayyorgarlik holati, jumladan, test sinovi o‘tkazilishi belgilangan binolar sonidagi o‘zgarishlar, kunlik test topshiradigan guruh va abituriyentlar soni, binolarni rejalashtirilgan texnik vositalar va qurilmalar bilan jihozlanganligi, sovutish tizimi, monitorlar o‘rnatilganligi, shuningdek, kutilayotgan natijalar, kelgusi yil rejalari bo‘yicha ma'lumotlar taqdim etildi.

Tele va radiokanallar, bosma va elektron ommaviy axborot vositalari vakillari, blogerlarning savollariga batafsil javob berildi.

Matbuot anjumani qizg‘in musohaba ruhida o‘tdi.

Axborot xizmati