Ma’lumki, 2020-yil 6-noyabrda O‘zbekiston Respublikasi Prezidentining “Ta’lim-tarbiya tizimini yanada takomillashtirishga oid qo‘shimcha chora-tadbirlari to‘g‘risida” PQ-4884-son qarori qabul qilindi.

Qarorning 9-bandida 2021-yil 1-yanvardan boshlab davlat oliy ta’lim tashkilotlariga kirish uchun test sinovi topshiriqlarini tuzish va ekspertizadan o‘tkazishning yangi tartibi joriy qilinishi belgilangan bo‘lib, qarorda belgilangan vazifalar ijrosini sifatli ta’minlash maqsadida 2020-yil 23-noyabr kuni Davlat test markazida O‘zbekiston Respublikasi Fanlar akademiyasi, Xalq ta’limi vazirligi, Oliy va o‘rta maxsus ta’lim vazirligi hamda Davlat test markazi  xodimlari ishtirokida yig‘ilish o‘tkazildi.

Yig‘ilishda soha mutaxsislari ona tili va adabiyot (o‘zbek, rus va qoraqalpoq tillari), chet tili (ingliz, nemis, fransuz tillari), fizika va matematika, tarix va geografiya, kimyo va biologiya fanlari bo‘yicha guruhlarga bo‘lingan holda “Fan mazmunining tarkibi” loyihasini keng muhokama qilishdi.

Muhokamalardan so‘ng “Fan mazmunining tarkibi” Davlat test markazi Ilmiy-metodik kengashi tomonidan tasdiqlandi.

Shundan so‘ng, Davlat test markazining fan ekspertlari tomonidan mazkur “Fan mazmunining tarkibi”ga asoslangan holda yangi test topshiriqlari shakllantirilib, aprobatsiya o‘tkazish uchun variantlar ishlab chiqildi.

Test topshiriqlari tarkibida o‘quv dasturlari asosida mantiqiy fikrlash, masala va misollarni bajara olish qobiliyatiga oid test topshiriqlaridan foydalanildi.

Ishlab chiqilgan test topshiriqlari joriy yilning 13-14-yanvar kunlari Qoraqalpog‘iston Respublikasi, viloyatlar va Toshkent shahrida aprobatsiyadan o‘tkazildi.

Aprobatsiyada akademik litsey, ixtisoslashtirilgan umumta’lim maktablari va umumiy o‘rta ta’lim maktablarining 5 ming nafardan ortiq bitiruvchilari ishtirok etdi.

Davlat test markazi matbuot xizmati