So‘nggi yillarda yurtimizda amalga oshirilayotgan qator islohotlar mamlakatimizning iqtisodiy, ijtimoiy sohalarida ko‘plab ijobiy o‘zgarishlarga sabab bo‘lmoqda. Shuningdek, ilm-fan taraqqiyotiga alohida e’tibor qaratilayotganligi quvonarli holdir. Prezidentimizning Oliy Majlisga Murojaatnomasida ta’lim tizimiga, xususan, oliy o‘quv yurtlariga qabul imtihonlari jarayoniga alohida urg‘u berib o‘tganligi bunga yaqqol dalildir.

Davlat test markazida oxirgi ikki yilda oliy o‘quv yurtlariga qabul test sinovlari jarayonini sifatli tashkil etish, qabul imtihonlarining shaffofligini ta’minlash, shuningdek, test topshiriqlarini soddalashtirish borasida qator ishlar amalga oshirildi.

Xususan, Angliya, Amerika Qo‘shma Shtatlari, Yaponiya, Koreya, Turkiya, Ozarbayjon, Rossiya, Qozog‘iston davlatlari test tizimlari o‘rganildi va ma’qul shakl va usullarni qo‘llash yuzasidan ishlar olib borildi.

 Masala yuzasidan shuni qo‘shimcha qilish kerakki, avvalgi yillarda o‘tkazilgan test sinovlari uchun foydalanilgan test topshiriqlari to‘plamlar shaklida chop etilib, abituriyentlar va mutaxassislarga taqdim etilmoqda. Jamoatchilik o‘z navbatida savollar to‘g‘risida o‘z fikr-mulohazalarini bildirmoqdalar va shular asosida test topshiriqlari bo‘yicha tegishli tahliliy ishlar olib borilmoqda.

Ma’lumki, joriy yildan oliy ta’lim muassasalari qabul test sinovlariga majburiy fanlar  (O‘zbekiston tarixi, ona tili, matematika) kiritildi. Ushbu fanlardan tuzilayotgan test topshiriqlari abituriyentning faqat yodlashga asoslangan bilimlarini emas, balki mantiqiy fikrlay olishiga, tayanch bilimlarini amalda qo‘llay olishiga qaratilgan. Majburuiy fanlar test topshiriqlari aprobatsiyasi natijalari ham test topshiriqlarining soddalashganligini ko‘rsatdi.

Hozirda aprobatsiya jarayonlari davom etmoqda.

Davlat test markazi matbuot xizmati