Davlat test markazi ta'lim muassasalariga o‘qishga qabul qilishda test sinovi orqali tanlab olishga oid davlat siyosatini amalga oshiruvchi yagona vakolatli davlat boshqaruvi organi bo‘lib, uning amalga oshiradigan vazifalaridan biri  pedagogik o‘lchov vositalarini takomillashtirish hisoblanadi. Bu sohada pedagogik o‘lchov vositalarini ishlab chiqish va ekspertizadan o‘tkazish talablari bo‘yicha metodik ko‘rsatmalarni ishlab chiqish, ekspertlar uchun testologiya asoslari bo‘yicha seminarlar tashkil etish vazifalari belgilangan.

Ushbu vazifalarni amalga oshirish maqsadida Davlat test markazining Testologiya, pedagogik o‘lchovlar va ilmiy-metodik kadrlar tayyorlash bo‘limi tomonidan o‘zbek tilida “Pedagogik o‘lchovlar nazariyasi asoslari”, “Pedagogik o'chovlarda test topshiriq turlari”, “Test tuzish metodikasi va ekspertizasi” nomli uslubiy qo‘llanmalar Davlat test markazida to‘plangan ilmiy-uslubiy tajribalar inobatga olingan holda tayyorlandi va nashr qilindi.

“Pedagogik o‘lchovlar nazariyasi asoslari” nomli uslubiy qo‘llanmada pedagogik o‘lchovlar nazariyasining konseptual apparati, ta'limda o‘lchov natijalarining ishonchliligi va validligi haqida hamda Pedagogik o‘lchovlarning ob'ektivligi, o‘lchov fazosi o‘lchami, o‘lchovlarning darajasi va shkalalari haqida ma'lumotlar keltirilgan. Shuningdek, xulosa, amaliy topshiriqlar va muhokama uchun savollar berilgan.

“Pedagogik o‘lchovlarda test topshiriq turlari” nomli uslubiy qo‘llanmada pedagogik o‘lchovlarda qo‘llaniladigan Test topshiriqlariga qo‘yiladigan umumiy talablar va ularning klassifikatsiyasi bo‘yicha ma'lumotlar, shuningdek, test topshiriq shakllarining qiyosiy xarakteristikasi, munozara uchun amaliy topshiriq va nazariy savollar berilgan.

“Test tuzish metodikasi va ekspertizasi” nomli uslubiy qo‘llanmada test materiallarini tayyorlash metodikasining mazmuni yoritilgan, test topshiriqlari turlari keltirilgan, shuningdek, ekspertlar tomonidan test materiallarining sifatini baholashning yo‘nalishlari, tamoyillari va beradigan tavsiyalari bayon etilgan. 

Uslubiy qo‘llanmalar o‘quvchilar bilimlarini baholashda pedagogik vosita sifatida testlardan foydalanadigan pedagoglarga, turli o‘quv fanlari bo‘yicha test tuzuvchi mutaxassislarga, test topshiriqlari ekspertizasini amalga oshiruvchi ekspertlarga, hamda testologiya bo‘yicha ilmiy izlanish olib borayotgan tadqiqotchilarga yordam berish uchun mo‘ljallangan.

Uslubiy qo‘llanmalardan foydalanuvchi talabgorlar Davlat test markaziga quyida keltirilgan manzil, telefon, faks yoki elektron pochta orqali murojaat qilishlari mumkin:

Manzil: 100084, Toshkent, Bog‘ishamol ko‘chasi, 12-uy.

Telefon: (998 71) 235-19-14.

Faks: (998 71) 234-71-84.

Elektron pochta: info@dtm.uz

Axborot xizmati