Nihoyat to‘lov-kontrakt asosida tahsil olayotgan talabalar uchun joriy o‘quv yilida to‘lov-kontrakt miqdorlari belgilandi. Bu haqda Oliy va o‘rta maxsus ta’lim vazirligining telegram kanalida xabar berildi.

Xabarga ko‘ra bakalavriat, magistratura va ikkinchi mutaxaxassislik bo‘yicha kunduzgi ta’lim shaklida to‘lov-kontrakt asosida tahsil olayotgan talabalarga kontrakt to‘lovining stipendiyali yoki stipendiyasiz shaklini tanlash imkoniyati yaratilgan. Endilikda ular to‘lovlarni shu shakllarning biri asosida amalga oshirishlari mumkin.

Keltirilgan jadvalda (https://t.me/eduuz/1238) kunduzgi ta’lim shakli bo‘yicha to‘lov-kontraktning stipendiyali qiymati to‘lovlari mehnatga haq to‘lashning eng kam miqdori hisobga olingan holda ko‘rsatilgan.

 Eslatish joizki, O‘zbekiston Respublikasi Prezidentning 2019 yil 12 iyuldagi PF-5765-son Farmoniga muvofiq 2019 yil 1 avgustdan boshlab mehnatga haq to‘lashning eng kam miqdori 634 880 so‘mni tashkil etadi. 

Shuningdek, xabarda qayd etilishicha, 2019/2020 o‘quv yilidan boshlab to‘lov-kontrakt asosida tahsil olayotgan talabalarga oylik to‘lanadigan stipendiya miqdori 400 000 so‘m etib belgilangan.

To‘lov-kontraktning yillik stipendiyasiz qiymati har oyda talabaga to‘lanadigan ana shu 400 000 so‘mni chegirib tashlash orqali hisoblanadi. Bu o‘n ikki oyda jami 4 800 000 so‘mni tashkil etadi. Demak, to‘lov-kontraktning yillik stipendiyasiz qiymatini hisoblashda stipendiyali to‘lov miqdoridan 4 800 400 ni ayirish kerak.

Misol uchun, bakalavriatning Pedagogika ta’lim yo‘nalishi bo‘yicha to‘lov-kontrakt asosida tahsil oladigan talaba 2019/2020 o‘quv yilidan boshlab, stipendiya bilan – 10 792 960 so‘m (mehnatga haq to‘lashning eng kam miqdoriga nisbatan 17 barobarida) ёки stipendiyasiz – 5 992 960 so‘m (10 792 960 so‘m -  4 800 000 so‘m) miqdorida to‘lovni amalga oshirishi mumkin.