Davlat test markazi rahbariyati tomonidan 2021-yilning 1-yarmi uchun belgilangan sayyor qabullar o‘tkazish rejasiga muvofiq Qoraqalpog‘iston Respublikasi va viloyatlarda Markaz faoliyatiga oid masalalar yuzasidan jismoniy va yuridik shaxslarning murojaatlarini ko‘rib chiqish maqsadida sayyor qabullar tashkil etish davom etmoqda.

Navbatdagi sayyor qabullar Davlat test markazi direktori Karimov Madjit Malikovich tomonidan Toshkent viloyatida, xususan, 23-fevral kuni O‘rta Chirchiq tumanida “Do‘stlik” mahalla fuqarolar yig‘ini, 42-umumta’lim maktabida va “Usmon ota” mahalla fuqarolar yig‘ini, 39-umumta’lim maktabida, shuningdek, 24-fevral kuni Bo‘stonliq tumanida “Xumson” mahalla fuqarolar yig‘ini, 19-umumta’lim maktabida va “Birlik” mahalla fuqarolar yig‘ini, 11-umumta’lim maktabida ochiq muloqot shaklida bo‘lib o‘tdi.

Yoshlar, bitiruvchi o‘quvchilar, o‘qituvchilar, ota-onalar va mas’ul shaxslar ishtirok etgan mazkur qabullar Prezidentimizning sohaga oid qarorlari, famonlari, Oliy Majlis deputatlari va xalqqa murojaatnomasi, “Yoshlarni qo‘llab-quvvatlash va aholi salomatligini mustahkamlash yili”da qabul qilingan Davlat dasturidan kelib chiqqan holda kirish test sinovlariga oid eng so‘nggi yangiliklar, kutilayotgan o‘zgarishlar, test sinovi jarayonlarini soddalashtirish, test topshiruvchilar uchun yanada kengroq imkoniyat, qulayliklarga asoslangan shart-sharoitlar yaratish, mantiqiy fikrlashga yo‘naltirilgan test topshiriqlaridan kengroq foydalanish, umumta’lim fanlaridan milliy test tizimini joriy etish, shuningdek, Davlat test markazi faoliyatini tartibga soluvchi normativ-huquqiy hujjatlar, qarorlar loyihalari sharhi, mazmun-mohiyatiga bag‘ishlandi.

Tadbirlar davomida katta qiziqish bilan qatnashgan o‘quvchilar, o‘qituvchilar, ota-onalar, mas’ul shaxslar va boshqalarning savollariga batafsil javob berildi.

Davlat test markazi matbuot xizmati