Ustama belgilash test sinovlarining birinchi bosqichi yakunlandi

2021-yil 26-28-dekabr kunlari chet tillar o‘qituvchilarining bazaviy lavozim maoshlariga oylik ustama belgilash test sinovlarining birinchi bosqichi bo‘lib o‘tdi.

Test sinovlari Qoraqalpog‘iston Respublikasi, viloyatlar va Toshkent shahrida ingliz, nemis, fransuz, ispan, italyan, xitoy, koreys, yapon, hindiy, turk, arab, fors va pushtu tillaridan o‘tkazildi.

Unda ishtirok etishi belgilangan 10 420 nafar chet tillar o‘qituvchilarining 8 388 nafari ishtirok etdi. 2032 nafar talabgor test sinovlariga kelmadi, 48 nafari esa tartib-qoidani buzganligi sababli test sinovlaridan chetlatildi.

Test sinovlarining birinchi bosqichidan muvaffaqiyatli o‘tgan talabgorlar uchun gapirish ko‘nikmasini baholash imtihonlari 2022-yilning yanvar-fevral oylarida o‘tkaziladi.