2019-yil 16-noyabr kuni “O‘zbekiston-Xitoy: tarixiy-madaniy, ilmiy va iqtisodiy aloqalar rivojlanishi” mavzuida xalqaro ilmiy-amaliy konferensiya bo‘lib o‘tdi.

Konferensiyada Xitoy, Rossiya (Rossiya davlat gumanitar universiteti, Rossiya xalqlar do‘stligi universiteti, Pedagogik o‘lchovlar federal instituti, Moskva pedagogika instituti, Sankt-Peterburg davlat universiteti va b.), Ozarbayjon, Qozog‘iston va respublikamizdagi sharq tillari kafedralari o‘qituvchilari ishtirok etdi.

Konferensiya Toshkent davlat sharqshunoslik instituti va O‘zbekistondagi Konfutsiy nomidagi institut tomonidan tashkil etildi. U tashkiliy jihatdan plenar yig‘ilish va 5 ta bo‘limning quyidagi ishlarini o‘zida aks ettirdi: lingvistika va o‘qitishning innovatsion usullari, falsafa va madaniyat tarixi, tarjimashunoslik, adabiyotshunoslik va manbaashunoslik, “Bir makon, bir yo‘l” tashabbusi doirasida iqtisodiy munosabatlar, yosh xitoyshunoslar maktabi.

Mazkur konferensiyada Davlat test markazining Chet tilini bilish darajasining pedagogik o‘lchovlarini rivojlantirish bo‘limi boshlig‘i Urayeva Elvira Usmanovna ishtirok etdi. U “O‘zbekiston Respublikasida chet tillarini bilish darajasini baholashda milliy test tizimini rivojlantirish istiqbollari” mavzuida ma’ruza qildi.

Shuningdek, konferensiyada xitoyshunoslik, tarjima, chet tillarini o‘qitish metodikasi, siyosatshunoslik va iqtisodiyotning turli masalalari yuzasidan tajriba va fikr almashishlar bo‘lib o‘tdi.

Konferensiya qatnashchilarining fikriga ko‘ra, ushbu maydon 100 yillar davomida xalqlarni birlashtirish, tillar va madaniyatlarning o‘zaro boyishiga xizmat qilib kelgan Buyuk ipak yo‘li an’analarining ajoyib davomi bo‘ldi.

Davlat test markazi matbuot xizmati