2020-yil 2-mart kuni Toshkent shahrida APTIS testlarini joriy etish bo‘yicha O‘zbekiston Respublikasi Vazirlar Mahkamasi huzuridagi Davlat test markazi va Britaniya Kengashi o‘rtasida shartnoma imzolandi.

Shartnomani imzolash marosimida O‘zbekiston Respublikasi Vazirlar Mahkamasi huzuridagi Davlat test markazi tomonidan direktor Karimov Madjit Malikovich va Britaniya Kengashi direktori Reychel Aylend (Rachel Ireland) hozir bo‘ldilar.

Shartnomaning asosiy maqsadi hamkorlikda pedagogika oliy ta’lim muassasalari o‘qituvchilari va talabalarining ingliz tilini egallash darajasini va natijadorligini oshirishning samarali yo‘llarini izlash hisoblanadi.

Mazkur shartnoma doirasida bir yil muddatda 2500 nafar nomzod test sinovidan o‘tkazilishi rejalashtirilgan.

APTIS imtihon tizimi ta’lim sektori uchun maxsus tayyorlangan bo‘lib, o‘qituvchilar uchun mavjud baholash tizimini to‘ldiradi. Shuningdek, natijalar dinamikasini tezkor kuzatib borish, pedagogika oliy ta’lim muassasalarining o‘qituvchilari va talabalarining ingliz tilini egallashida zarur bo‘lgan ko‘nikmalarni testdan o‘tkazish imkonini beradi.

Davlat test markazi va Britaniya Kengashi hamkorligida o‘tkaziladigan APTIS for teachers imtihoni asosida C darajaga ega bo‘lgan o‘qituvchilarning bazaviy oylik maoshiga 15 foiz va 30 foiz ustama belgilanadi.

Davlat test markazi matbuot xizmati