Mámleket komissiyasınıń 1-sanlı bayanı menen 2020-2021-oqıw jılı ushın hayal-qızlarǵa ajıratılǵan tórt payızlı qosımsha mámleketlik grantı tiykarındaǵı qabıllaw kórsetkishleriniń aymaqlar kesimindegi bólistiriliwi tastıyıqlanǵan.

Bunda hayal-qızlar ushın joqarı bilimlendiriw mekemeleriniń bakalavriatınıń kúndizgi bilimlendiriw formasına qosımsha mámleketlik grantı tiykarında aymaqlar kesiminde jámi 940 kvota ajıratılǵan.

Sonday-aq, bul bayan menen Máhálle hám shańaraqtı qollap-quwatlaw ministrligi tárepinen  2020-jıl 15-iyulǵa shekem tiyisli usınısnamalardı hayal-qızlarǵa beriw hám 20-iyulǵa shekem usınısnama berilgen talabanlardıń juwmaqlawshı dizimi Mámleketlik test orayına jiberiliwi belgilengen. Yaǵnıy usınısnamaǵa iye hayal-qızlar haqqındaǵı maǵlıwmatlar Máhálle hám shańaraqtı qollap-quwatlaw ministrligi tárepinen Mámleketlik test orayına jiberiledi hám usı maǵlıwmatlar tiykarında abiturientlerge jeńillik qollanıladı.

Sonıń ushın, bunday usınısnamaǵa iye abiturientler onlayn dizimnen ótiwde usınısnama maǵlıwmatların baǵdarlamaǵa kirgizbeydi.

Esletip ótemiz, hayal-qızlar ushın qosımsha kvota tek kúndizgi bilimlendiriw forması ushın ajıratılǵan bolıp, sırtqı hám keshki bilimlendiriw formaları ushın ámel etpeydi.

Mámleketlik test orayı xabar xızmeti