Jamoatchilik uchun ijtimoiy tarmoqlar gazeta, jurnal, televideniye orqali axborot olish oqimini kamaytirdi, desak mubolag‘a bo‘lmaydi. Ha, bugungi kunda veb-saytlar, telegram kanallar, facebook, instagram kabi ijtimoiy tarmoq resurslari va platformalari o‘quvchi yig‘ish bobida kosmik tezlikka ega.

Endi uning ikkinchi tomoni haqida. Bu ikkinchi tomon ham jamoatchilikni eng so‘nggi ma’lumotlar, axborotlar bilan tezkor ta’minlashda juda muhimdir. Biroq bunday kosmik tezlik faqat yaxshi, haqiqatni uzatish bilan kelishmaydi, tezlik keskin pasayadi. Bu yerda gap turli “bomba” ma’lumotlar, haqiqatdan uzoq bo‘lsa-da, yaxshigina “qovurilgan”, shakl berilgan “yolg‘on, soxtalik” to‘g‘risida ketmoqda.

Birinchi ma’lumot – “Repetitor” gazetasining bosh sahifasida berilgan “DTM bilan hamkorlikda chop etilgan majmualardagi testlarning to‘g‘ri javoblari va ishlanmalari” nomli e’lon.

Gazeta tahririyati bu bilan nimani nazarda tutmoqchi? “Biz va DTM bilan hamkorlikda chop etilgan”, demoqchimi? Agar haqiqiy ma’lumotni bermoqchi bo‘lganda u “DTM tomonidan chop etilgan” deb yozilishi lozim edi. Buni endi, gazetada qayd etilganidek, yangi sonlarida ko‘ramiz.

Ikkinchi ma’lumot – uznews.uz veb-saytida joriy yil 16-dekabr kuni e’lon qilingan ma’lumotlardir.

Skrinshotdan ko‘rishingiz mumkin – mazkur materialda “Государственный центр тестирования составил рейтинг самых дорогих вузов Узбекистана”, ya’ni Davlat test markazi O‘zbekistondagi eng qimmat oliy ta’lim muassasalari reytingini tuzib chiqdi, yozuvi mavjud va ma’lumotlarni olgan manbaga havola berilgan.

Havola uchun ko‘k rangda berilgan so‘zning ustiga bosilsa, mana bu rasmdagi ma’lumotlar kelib chiqadi.

Mazkur telegram kanal esa norasmiy va Davlat test markaziga mutlaqo aloqasi yo‘q.

Yana bir bor afsuski, navbatdagi soxta telegram kanal orqali Davlat test markaziga hech bir aloqasi yo‘q ma’lumotlar uzatilmoqda.

Davlat test markazi birinchi holatda test to‘plamlarini chop etishda faqatgina “Davr Press” bilan hamkorlik qilayotganligini qayd etamiz. Shuningdek, chop etilayotgan to‘plamlarda test topshiriqlari javoblari keltirilmagan.

Ikkinchi holatda – “Государственный центр тестирования” nomli telegram kanal Davlat test markaziga tegishli emas hamda unda berilayotgan ma’lumotlar ham soxta va yolg‘on. Eslatish joizki, Davlat test markazi tomonidan oliy o‘quv yurtlarining qimmatlilik darajasi bo‘yicha reyting tuzilgan emas va bu uning vakolatiga kirmaydi.

Oldingi maqolalarimizda keltirilganidek, esli-hushli odam oltin deb bilgan vaqtini bu kabi soxta jurnalist va yolg‘on xabarlar bilan kurashga sarflamaydi, bu juda to‘g‘ri qarordir.

Shu o‘rinda shubhali manbalarda Davlat test markazi nomidan berilayotgan ma’lumotlarning haqiqiyligini aniqlash maqsadida bevosita biz bilan bog‘lanishga doir istagimizni to‘g‘ri tushunasiz hamda quyida keltirilayotgan rasmiy veb-saytimiz, telegram kanallarimiz, facebook, instagram va YouTube dagi sahifalarimizni eslab qolasiz, degan umiddamiz.

Davlat test markazining rasmiy sahifalari:

Sayt: https://dtm.uz/.

Telegram: t.me/rasmiydtm.

Facebook: facebook.com/dtm.uzbekistan.

Instagram: instagram.com/dtm.uzbekistan.

YouTube: youtube.com/channel/UCKpI-VH4ckfHvFgcpGbyPTw.

Chet tilini bilish va egallash darajasini baholash boshqarmasining telegram kanali: t.me/nsfla_uz.

Davlat test markazi direktori Madjit Malikovich Karimovning telegram kanali: t.me/davlat_test_markazi_direktori.

Davlat test markazining bundan boshqa hech qanday rasmiy sahifalari mavjud emas.

Davlat test markazi matbuot xizmati