Joriy yil 7-oktabr kuni O‘zbekiston Respublikasi Vazirlar Mahkamasi huzuridagi Davlat test markazida yoshlarga oid davlat siyosati sohasidagi ishlar natijadorligi va yoshlar bilan ishlash samaradorligini oshirish borasidagi dolzarb vazifalarning ijrosiga bag‘ishlangan “Yoshlar muammolari va ularning yechimi!” mavzusida yoshlar bilan uchrashuv bo‘lib o‘tdi.

Ochiq suhbat shaklida o‘tgan ushbu uchrashuvda Davlat test markazining markaziy apparati, Qoraqalpog‘iston Respublikasi va viloyatlardagi bo‘limlarida faoliyat olib borayotgan yosh mutaxassislarni ijtimoiy, ma’naviy qo‘llab-quvvatlash, ularni yetuk kadr sifatida yuksalishi masalalariga to‘xtab o‘tildi.

Uchrashuv davomida mamlakatimizda yoshlarni ma’naviy yetuk va jismonan sog‘lom, vatanparvar va fidoiy etib tarbiyalash, ularning huquq va manfaatlarini himoya qilish borasida keng ko‘lamli ishlar amalga oshirilganligi va islohotlar davom etayotganligi e’tirof etildi.

Davlat test markazi direktori M.Karimov qator vazifalarni sifatli bajarish bilan birgalikda, bakalavriat, magistratura (2-bosqichi), akademik litseylar hamda xorijdan o‘qishini ko‘chirish bo‘yicha test sinovlari va shu kabi o‘tkazilayotgan 30 dan ortiq boshqa test sinovlarining shaffof va adolatli, zamonaviy axborot-kommunikatsiya texnologiyalaridan foydalangan holda o‘tkazilayotganida yosh kadrlar ham muhim o‘rin tutayotgani, shular bilan bir qatorda, yoshlarga ilg‘or xorijiy davlatlarda magistratura, doktoranturada o‘qish, malaka oshirish va stajirovka o‘tashi bo‘yicha keng imkoniyatlar yaratilganligi, yoshlarning bundan keyin ham test jarayonlarini takomillashtirish bo‘yicha xatti-harakatlari rag‘batlantirib borilishini ma’lum qildi.

O‘z navbatida, Davlat test markazi rahbariyati yoshlarni muntazam ijtimoiy himoya qilish, sport bilan shug‘ullanish uchun yaratilgan bazani yanada kengaytirish, shart-sharoitlarni yanada yaxshilash, ayniqsa, ilmiy ish bilan shug‘ullanishni muvaffaqiyatli davom ettirish, uni yuqori bosqichga ko‘tarish bo‘yicha har qanday madad va ko‘makka tayyor ekanligini bildirdi.

Qizg‘in musohaba tarzida va do‘stona ruhda o‘tgan ochiq muloqot paytida yoshlarning barcha savollariga batafsil javob berib borildi va taklif, fikr-mulohazalari eshitildi.

Davlat test markazi matbuot xizmati