Jonajon vatanimizning og‘ir yukini yengillashtirayotgan yoshlarimizning ta’lim va tahsil maydonida javlon urayotganligi, hali yosh bo‘lishiga qaramay, xavotirsiz juda mas’uliyatli jilovlarni qo‘llariga olayotganligi kelajagimiz ishonchli qo‘llarda ekanligidan darak beradi.

Bu albatta, yurtimizda yoshlarimizga bo‘lgan mehr va e’tibor, ular uchun har sohada keng yo‘l ochilganligi, qo‘llab-quvvatlash yuksak daradaja bo‘layotganligining mevasidir.

Hammaga ma’lumki, oliy ta’lim oluvchi yoshlarimiz soni yildan-yilga ortib bormoqda. Ularning oliy dargohlarda tahsil olishi uchun hozirgacha amaliyotda bo‘lmagan imtiyozu imkoniyatlar yaratilmoqda.

Joriy yilda yurtimizda davom etayotgan murakkabliklarga qaramay, oliy ta’lim muassasalarining bakalavriatiga o‘qishga kirish bo‘yicha ancha yengilliklar, soddalashtirishlar yo‘lga qo‘yildi. Abituriyentlarimiz bugun uzoq yoki yaqin viloyatlarga bormay, hatto uydan chiqmay ko‘p talablarni bajarmoqdalar. Masalan, 30-iyun kuni soat 18:00 gacha test sinovida ishtirok etish maqsadida jami 286 115 nafar yoshlarimiz onlayn ro‘yxatdan o‘tdi.

Bugungi cheklovlarga qaramay, Yoshlar kuni ayyomi tufayli, respublikamizning barcha hududlarida yoshlarimizni qutlovchi anjumanlar, tadbirlar uyushtirilmoqda.

Shu munosabati bilan Davlat test markazi jamoasi nomidan ularning harakatlari muvaffaqiyatli intiho topishini, barcha yoshlarimizning ezgu niyatlari amalga oshishini tilayman! Kelajakda yoshlarimizning vatanimiz kutganidek, zabardast, yuksak ma’naviyatli va saviyali, ilg‘or bilimli inson sifatida jahonga dovruq qozonib yurishlariga ishonamiz!

Aziz yoshlar! Barchangizga sog‘lik-salomatlik, muvaffaqiyat va zafarlar yor bo‘lsin!

Davlat test markazi direktori Majid Karimov