Oliy ta'lim muassasalarining bakalavriat ta'lim yo‘nalishlariga kirish test sinovlari yakuniga yetmoqda. O‘n sakkiz kun davom etadigan ushbu jarayonni mamlakatimizning ta'lim sohasiga, ayniqsa oliy ma'lumotli bo‘lishga intilayotgan yoshlarimiz taqdiriga befarq bo‘lmagan barcha – barcha kuzatib, tahlil qilib bormoqda va o‘z fikr-mulohazalarini bildirmoqda.

Joriy yildan abituriyentlar uchun yaratilgan shart-sharoit, imkoniyat va imtiyozlar tizimi anchagina yaxshilandi, jarayon shaffofligi oshdi. Bu xalqimiz tomonidan yaxshi kutib olindi. Biroq ayrim fuqarolarimiz esa bunday ko‘p yangiliklar oqimini to‘la tushunmayaptilar. Buni yo‘lga qo‘yilgan har bir imkoniyat, imtiyoz yoki shaffoflikni yanada kengroq ta'minlash uchun joriy etilgan dasturiy ta'minotlarni bilmasliklaridan desak, to‘g‘riroq bo‘ladi.

Misol uchun, fuqaro Zumrat Temirovaning ijtimoiy tarmoqda joylashtirilgan fikr-mulohazalari ana shu bilmaslikning oqibatidir. Uning yozishicha, qizi test sinovlarida ishtirok etgan va mandat.dtm.uz saytidan katta ball olganligini aniqlaganlar. Lekin keyingi kunlarda mazkur sayt orqali farzandi avval ko‘rgan joyida emas, balki pastga tushib ketganligini ko‘rib, turli xayollarga borishgan. Xususan, Z.Temirova “Davlat test markazi past balli abituriyentlarni pora evaziga yuqori o‘rinlarga joylashtirgan, mana sizga korrupsiya bilan kurashish, bu mamlakatni o‘zgartirib bo‘lmaydi, oldinlari pora bilan o‘qishga kirgan bo‘lsa, hozir ham shunday” kabi bo‘lmag‘ur fikrlarini bayon etgan. Agar muhtarama Z.Temirova saytga birinchi kirgan paytida uning qizi ro‘yxatdan o‘tgan ta'lim yo‘nalishi bo‘yicha abituriyentlarning bir qismi test sinovida ishtirok etganligini, sahifaning pastki qismiga tushaverganda qolgan abituriyentlar keyingi kunlarda test topshirishi belgilanganligini ko‘rgan bo‘lardi. Shuningdek, u ko‘rgan ko‘rsatkichlar umumiy xarakterda ekanligi, birinchi, ikkinchi, uchinchi ta'lim yo‘nalishi bo‘yicha hali bo‘linmaganligini, holatga test sinovlari to‘la yakunlangandan keyin oydinlik kiritilishini anglagan bo‘lardi. Shunda ushbu katta jarayonga jalb etilgan davlat tashkilotlari, insonlar sha'niga bunday noma'qbul fikrlarni bildirmagan bo‘lardi.

Afsuski, jamoatchilikda aynan salbiy o‘y-xayollar paydo bo‘lmasligi uchun va shaffoflik, adolatlilik, xolislikni to‘la ta'minlash maqsadida yo‘lga qo‘yilgan bunday yaxshilikni anglay olmaslik holatlari ham uchrab turibdi. Mamlakatimiz rahbariyatining qutlug‘ qadami bilan davlat boshqaruv va xo‘jalik organlari faoliyatining ochiqligini, shaffofligini ta'minlash bo‘yicha olib borilayotgan ishlar o‘z samarasini bera boshlagan bir paytda fuqarolarimiz tomonidan bunday tosh otishlarni oqlab bo‘larmikin?! Yoki Z.Temirova adolat uchun kecha-kunduz mehnat qilayotgan fuqarolarimiz sha'niga dog‘ tushirishga harakat qilmasdan, bevosita Davlat test markaziga murojaat qilib, aniq javob olishi mumkin ediku?!

Fursatdan foydalanib, yana bir bora eslatib o‘tmoqchimiz: saytlarda e'lon qilingan ballar miqdori abituriyentning egallagan yakuniy o‘rnini bildirmaydi. Birinchi, ikkinchi va uchinchi ta'lim yo‘nalishlari kesimida ballar bo‘yicha saralash yakunlangach, oydinlik kiritiladi.

Abituriyentlarning to‘plagan ballari haqidagi ma’lumot test sinovi o‘tkazilgan kunning ertasiga, tanlov asosida talabalikka tavsiya etilgani yoki etilmagani bo‘yicha belgilangan tartibda tasdiqlangan test sinovlari natijalari test sinovlari to‘liq yakunlangandan keyin bir hafta ichida Davlat test markazining rasmiy veb-saytida e’lon qilinadi hamda oliy ta’lim muassasalariga yetkaziladi.

Buning uchun oz vaqt kutishga to‘g‘ri keladi. Sabrsiz bo‘lmang.

Davlat test markazi