2020-yilning 10-mart kuni O‘zbekiston Respublikasi Vazirlar Mahkamasi huzuridagi Davlat test markazida korrupsiyaga qarshi kurashga bag‘ishlangan ochiq davra suhbati bo‘lib o‘tdi. 

“Korrupsiya bilan hech qachon maqsadimizga erisha olmaymiz” mavzuida o‘tgan ushbu tadbir doirasida sohaga oid O‘zbekiston Respublikasi Qonunlari, O‘zbekiston Respublikasi Prezidentining qaror va farmonlarida belgilangan dolzarb vazifalarning amalga oshirilish holati, bunday vazifalarning Davlat test markazida ijrosi yuzasidan olib borilayotgan ishlar va kelgusida bunday ishlarni amalga oshirishning aniq mexanizmlari to‘g‘risida ma’ruzalar qilindi. Shuningdek, misollar asosida korrupsiya belgilari, tasnifi, uning oldini olishda eng muhim qurol – bu to‘la shaffoflik va adolatlilikni ta’minlash hamda bu sohada yakdil kurash har bir fuqaroning burchi ekanligi aytib o‘tildi.

Ochiq davra suhbatida O‘zbekiston Respublikasi Oliy Majlisi Qonunchilik palatasi mas’ul xodimi Sh.To‘xtashev, Bosh prokuraturadan S.Mamanov, Davlat test markazi rahbariyati va jamoasi hamda ommaviy axborot vositalari vakillari ishtirok etdilar. 

Tadbir jonli musohaba ruhida va qizg‘in savol-javob tarzida o‘tdi.

Davlat test markazi matbuot xizmati